Phenix Gazette

ALEXANDRIA GAZETTE.
JANET AN' MEP
Sung by Mary Riddle to Christopher North.
O, wha are sae happy,
As me an' my Janet?
O, wha are sae happy
As Janet an' me?
We're baith turning auld,
An' our walth is soon tauld,
But contentment we'll find
In our cottage sae wee.
She spins the lang day,
When I'm out wi' the owsen,
She croons i' the house,
While I sing at the plough;
And aye her blithe smile
Welcomes me frae my toil,
As up the lang glen,
I come wearied, I trow
When I'm at the Beuk,
She is mending the cleadin'
She's darning the stockings,
When I sole the shoon;
Our cracks keep us cheary-
We work till we're weary.
An' syne we sup sowans,
When ance we are done.
Aboon our auld heads
We've a decent clay biggin',
That keeps out the cauld,
When the simmer's awa;
We've twa wabs o' linen
O' Janet's ain spinnin',
As thick as dog-lugs,
An' as white as the snaw.
Nae doubt, we have seen
Our ain sorrows and troubles
Aften times pouches toom,
An' hearts fu' o' care;
But still, wi' our crosses,
Our sorrows, an' losses;
Contentment, be thankit,
Has aye been our share!
A' ye, wha ne'er ken
The straught road to be happy,
Wha are na content,
Wi' the lot that ye dree,
Come down to the dwellin'
Of whilk I've been tellin',
Ye'll learn, by lookin'
At Janet an' me!